კახის რაიონის ილია ჭავჭავაძის სახელობის ქართული სახელმწიფო დრამატული თეატრის პრემიერა ბაქოში
14 იანვარს, ბაქოში, სახელმწიფო აკადემიურ ეროვნულ დრამატულ თეატრში კახის რაიონის ილია ჭავჭავაძის სახელობის ქართული სახელმწიფო დრამატული თეატრის პრემიერა გაიმართა. ქართული თეატრის დასმა ბაქოელ მაყურებელს მირზა ფათალი ახუნდოვის “ლენქორანის ხანის ვეზირი” ქართულ ენაზე წარუდგინა. პიესის ქართული თარგმანი აკაკი წერეთელს ეკუთვნის.
ქართული თეატრის ბაქოში გასტროლები აზერბაიჯანის რესპუბლიკის კულტურის სამინისტროსა და აზერბაიჯანის სახელმწიფო აკადემიური ეროვნული დრამატული თეატრის ერთობლივი მხარდაჭერით გაიმართა.
პრემიერას აზერბაიჯანელ პუბლიკასთან ერთად საქართველოს ელჩი ზურაბ პატარაძე, საელჩოს თანამშრომლები და საქართველოს სხვა მოქალაქეებიც ესწრებოდნენ. სპექტაკლის დასასრულს ელჩი ზურაბ პატარაძე პირადად შეხვდა და გაესაუბრა ქართული თეატრის დასს და მის წევრებს შემდგომი წარმატებები უსურვა.
ილია ჭავჭავაძის სახელობის სახელმწიფო ქართული დრამატული თეატრის დირექტორმა ზიტა ხალილოვამ ელჩს თეატრის გუნდის სახელით მხარდაჭერისა და ყურადღებისათვის მადლობა გადაუხადა.
