საქართველოს საელჩო აზერბაიჯანის რესპუბლიკაში

13 ივნისს, აზერბაიჯანის რესპუბლიკას ოფიციალური ვიზიტით სტუმრობდა საქართველოს შინაგან საქმეთა მინისტრი გელა გელაძე. ვიზიტის ფარგლებში, მინისტრმა შეხვედრა გამართა აზერბაიჯანელ კოლეგასთან, ვილაიათ ეივაზოვთან. მხარეებმა განიხილეს ორ ქვეყანას შორის სამართალდაცვით სფეროში არსებული პარტნიორობის პერსპექტივები. საუბარი შეეხო როგორც ორმხრივ, ასევე რეგიონულ დონეზე სამართალდამცავი ორგანოების თანამშრომლობის გაძლიერებას - უსაფრთხოების, ორგანიზებულ დანაშაულთან ბრძოლის, ასევე პოლიციის ატაშეების ინსტიტუტის გაძლიერების მიმართულებით. შინაგან საქმეთა სამინისტროში გამართულ შეხვედრებს აზერბაიჯანის რესპუბლიკაში საქართველოს ელჩი, ზურაბ პატარაძე ესწრებოდა.

7 ივნისს, ქალაქ ბაქოს აკადემიურ მუსიკალურ-დრამატულ თეატრში ნოდარ დუმბაძის ნაწარმოების მიხედვით დადგმული სპექტაკლის „კუკარაჩას“ პრემიერა გაიმართა. ოზურგეთისა და განჯის თეატრების ერთობლივი სპექტაკლის დამდგმელი რეჟისორი ოზურგეთის სახელმწიფო დრამატული თეატრის დირექტორი და სამხატვრო ხელმძღვანელი ვასილ ჩიგოგიძეა. ერთობლივ პროექტში მონაწილეობდნენ ოზურგეთისა და განჯის თეატრების მსახიობები, სპექტაკლი ორ ენაზე მიმდინარეობდა. პრემიერას აზერბაიჯანის კულტურის სამინისტროსა და სახელოვნებო წრეების წარმომადგენლები, ასევე საქართველოს საგანგებო და სრულუფლებიანი ელჩი ზურაბ პატარაძე და საელჩოს თანამშრომლები ესწრებოდნენ. ბაქომდე კი, 5 ივნისს სპექტაკლ „კუკარაჩას“ პრემიერა ქალაქ განჯაში გაიმართა.

საქართველოს დამოუკიდებლობის დღის აღსანიშნავად, 26 მაისს, საქართველოს დროშის ფერებში განათდა აზერბაიჯანის დედაქალაქის, ბაქოს ორი ღირსშესანიშნავი შენობა - ჰეიდარ ალიევის ცენტრი და ბაქოს ოლიმპიური სტადიონი.

24 მაისს, ქ.ბაქოში, ჰეიდარ ალიევის ცენტრში, საქართველოს დამოუკიდებლობის დღისადმი მიძღვნილი საზეიმო კონცერტი გაიმართა. ღონისძიება აზერბაიჯანის რესპუბლიკაში საქართველოს საელჩოს, საქართველოს საგარეო საქმეთა და კულტურის სამინისტროების ორგანიზებით, ასევე ჰეიდარ ალიევის ფონდის მხარდაჭერით ჩატარდა. ქართული კულტურის დღეების ფარგლებში, ჰეიდარ ალიევის ცენტრის აუდიტორიუმის დარბაზში, მაესტრო ნიკა ნიკვაშვილისა და სიმფონიური ორკესტრის, მუსიკალური ბენდის, ანსამბლ „შვიდკაცას“ და ცნობილი ქართველი სოლისტების - ლიზა ბაგრატიონის, მანანა თოდაძის, კოტე ყიფიანისა და ოთო ბაზერაშვილის შესრულებით საყოველთაოდ ცნობილი ქართული და აზერბაიჯანული კომპოზიციები გაჟღერდა. საზეიმო კონცერტს ესწრებოდნენ აზერბაიჯანის რესპუბლიკის აღმასრულებელი და საკანონმდებლო ხელისუფლების წევრები, ქვეყანაში აკრედიტებული დიპლომატიური კორპუსის, საზოგადოებრივი ორგანიზაციების, ბიზნეს წრეების, კულტურის სფეროსა და დიასპორის წარმომადგენლები, საქართველოს პარლამენტის წევრები და საქართველოდან მოწვეული სხვა სტუმრები. ხოლო საპატიო სტუმრის სტატუსით, კონცერტს აზერბაიჯანის რესპუბლიკის მილი მეჯლისის თავმჯდომარე საჰიბა გაფაროვა დაესწრო. საღამოზე შეკრებილ საზოგადოებას სიტყვით მიმართეს საგანგებოდ ამ დღეებისათვის ბაქოში ვიზიტით მყოფმა საქართველოს კულტურის მინისტრმა, თინათინ რუხაძემ და საქართველოს საგანგებო და სრულუფლებიანმა ელჩმა ზურაბ პატარაძემ.

23 მაისს, ქ.ბაქოში, სასტუმრო Four Seasons-ში, საქართველოს დამოუკიდებლობის დღისადმი მიძღვნილი საზეიმო მიღება გაიმართა. ღონისძიება აზერბაიჯანის რესპუბლიკაში საქართველოს საელჩოს, საქართველოს საგარეო საქმეთა და კულტურის სამინისტროების ორგანიზებით ჩატარდა. დიპლომატიურ მიღებას აზერბაიჯანის რესპუბლიკის აღმასრულებელი და საკანონმდებლო ხელისუფლების წევრები, ქვეყანაში აკრედიტებული დიპლომატიური კორპუსის, საზოგადოებრივი ორგანიზაციების, ბიზნეს წრეების, კულტურის სფეროსა და დიასპორის წარმომადგენლები ესწრებოდნენ. საზეიმო საღამოს საგანგებოდ ამ დღეებისათვის ბაქოში ვიზიტით მყოფი კულტურის მინისტრი, თინათინ რუხაძე, საქართველოს პარლამენტის წევრები და საქართველოდან მოწვეული სხვა სტუმრები დაესწრნენ. საზოგადოებას სიტყვით მიმართეს ღონისძიების საპატიო სტუმარმა, აზერბაიჯანის რესპუბლიკის მილი მეჯლისის თავმჯდომარემ, საჰიბა გაფაროვამ და საქართველოს საგანგებო და სრულუფლებიანმა ელჩმა ზურაბ პატარაძემ. საზეიმო საღამოზე სტუმრებს საშუალება ჰქონდათ, დაეთვალიერებინათ ქართული ტრადიციული სამკაულისა და სამოსის გამოფენა; გაჟღერდა ორი ქვეყნის ჰიმნები და საყოველთაოდ ცნობილი ქართული და აზერბაიჯანული კომპოზიციები, რომლებიც დამსწრე საზოგადოებისათვის ანსამბლმა შვიდკაცამ, სიმფონიურმა ორკესტრმა ნიკა ნიკვაშვილთან ერთად და მუსიკალურმა ბენდმა შეასრულეს; გაიმართა ქართული ღვინის დეგუსტაცია; წარმოდგენილი იყო ქართული სამზარეულოს მასტერკლასები.